„Хенк ова не го правел никогаш“ е насловот на делото објавено во PDF формат и слободно за преземање од страна на заинтересираната читателска публика. 

Одлуката да се објави ова дело под Криејтив комонс, Јуракот ја има донесено заради времето во кое живееме, или како што тој вели „дигитално и пиратско до коска“. Во продолжение, вели тој: „Оригиналите конечно умреа и на одреден начин тоа ме прави многу релаксиран. Всушност целиот концепт на оригиналност драматично е променет. Денес имаме една единствена копија, закачена на даден сервер и истата ја симнуваат и делат стотици, илјадници, а сето тоа се случува неверојатно брзо и речиси истовремено. Со ова оригиналноста останува во содржините на самото дело, а на авторот му се дава шанса да влезе во сите тие персоналци бивајќи дигитален ексклузивитет, чиста идеја, фикција - родно место на пораките што ги носи“.

Според него, делото конечно му се вратило на авторот и со ова завршило посредништвото, ограничените тиражи, цензурата - монополот над книжевноста, што подразбира кој смее, а кој не смее да објавува. „Сега 'продава' единствениот кој има одговорност тоа да го прави - авторот, а Криејтив Комонс одлично ја легитимира таа врска помеѓу авторот и неговото дело“, вели Јуракот.

„Хенк ова не го правел никогаш“ претставува колекција од 30 песни плус бонус, 2 интервјуа и 5 фотографии, сите создадени во периодот 2006-2008 година.

„Дизајнот за колекцијата е динамичен, тоа е класичен веб дизајн и уште едно дополнување кон идејата и прагматичната функционалност на мрежата.Песните се фиктивно поделени на 3. 3 нешта. Веројатно се тоа различни фази на осаменост пласирани во различно време. Тука се жените, пијачките, баровите.. љубовта, сексот.. и конечно, тука е отсуството на сето тоа. Изгледа дека минатото е искуство без некоја особена функција, еден вид на совет што задоцнил на целта,“ ја завршува мислата Јурак от Петроф.