Во последно време до Дирекцијата за заштита на личните податоци се почесто стигнуваат известувања за злоупотреба на личните податоци на интернет, конкретно на порталите за социјална интеракција. Креирањето на лажни профили на порталите за социјална интеракција не е во согласност со одредбите на Законот за заштита на личните податоци и со основните принципи за заштита на личните податоци.

Дирекцијата е во постојана соработка со тимовите на порталите од ваков тип што придонесува за брзо и ефективно откривање и решавање на проблемите врзани со повредата на личните податоци, но сепак, најважно е сите оние кои ги користат ваквиот тип на веб страници и портали да внимаваат кога објавуваат свои, но и туѓи податоци на интернет.

 Препораки на Дирекцијата до провајдерите:

• Транспарентност и отворена информација до корисниците т.е. јасно истакната политика на приватност.
• Овозможување на креирање и користење на профилите под кориснички имиња – псевдоними.
• Исполнување на ветувањата дадени на корисниците.
• Лесно достапни поставки (settings) за уредување на политиката на приватност на веб страницата.
• Подобрување на контролата врз користењето на податоците на корисниците.

Препораки на Дирекцијата до граѓаните корисници:

• Внимавајте! Размислете добро пред да ги објавите своите лични податоци (особено името и презимето, адресата и телефонскиот број) на порталите за  социјална интеракција.
• Размислете два пати дали ќе го користите вистинското име или ќе употребите псевдоним.
• Почитувајте ја приватноста на другите. Бидете особено внимателни со објавувањето на лични податоци или информации кои се однесуваат на друго лице (како и фотографии или линкови до фотографии) без негова согласност.
• Информирајте се! Кој управува со сервисот кој го користите? Под надлежност на која земја спаѓа? Дали во земјата постои орган за заштита на личните податоци до кој може да се обратите во случај на злоупотреба на Вашите лични податоци? Дали Ви се понудени опции за заштита на Вашите лични податоци?
• Користете ги сите достапни поставки (settings) за уредување на политиката на приватност на веб страницата. Ограничениот пристап до Вашиот профил треба да Ви биде понуден, особено кога станува збор за опцијата за пребарување.
• Користете различни податоци за идентификација на интернет. Корисничките имиња и лозинки е пожелно да бидат различни на различни веб страници.
• Внимавајте на тоа како Вашите деца го користат интернетот особено кога станува збор за портали за социјална интеракција.

Злоупотребата на личните податоци на интернет е се почеста во последно време и токму заради тоа Дирекцијата е поттикната да организира различни активности за едукација на младите како најголем и најчест корисник на овој медиум.
Меѓу другото, Дирекцијата е вклучена и во проектот Заштита и безбедност на децата и нивните права на интернет инициран и спроведуван од Фондацијата Метаморфозис.