Системот за патентирање се злоупотребува за да се ограничи конкуренцијата со цел економска добивка на малкумина, но не успева да промовира иновација. Околината на пазарот на софтвер ќе биде во поповолна позиција ако воопшто нема патенти врз софтверот. Здравата конкуренција ги поттикнува играчите на пазарот да иновираат.

Одлуките на европските судови во повеќето случаи сѐ уште ја прифаќаат валидноста на софтверските патенти што се доделени од националните канцеларии за патенти и од Европската канцеларија за патенти која е надвор од демократска контрола. Тие не само што продолжуваат да ги одобруваат, туку и лобираат за нив. И покрај актуелната длабока криза на системот за патенти, тие не се во можност да направат реформа и ги ставаат во неповолна позиција европските бизниси со нивната мека политика за одобрување на патенти.

Во 2005 изгледаше дека Комисијата повеќе ги поддржува интересите на големите меѓународни конгломерати отколку интересите на малите и средни европски претпријатија — главната сила што стои зад иновацијата во Европа. На крајот, Европскиот парламент ја одби директивата за софтверски патенти, но тој нема право на легислативни иницијативи.

Заклучоци

Студии

Голем број сериозни научни и економски студии го оправдуваат укинувањето на патентите за софтвер.
Авторски права за софтверот, но не и патенти

Авторите на софтвер се веќе заштитени со законите за авторски права, со што се овозможува иновирање од сите учесници во истото опкружување и со тоа се генерира здрава конкуренција. Оваа заштита е поткопана од софтверските патенти. Многу е лесно да се повредат софтверските патенти без да се биде свесен за прекршувањето. Софтверските компании не го користат и не им е потребен системот за патенти за да иновираат. Тие треба да се заштитени од сопствениците на патентите што се сомнително доделени.

Судски спорови наместо иновација

Софтверските патенти не ја погодуваат нивната легитимна цел. Патентирањето на софтвер ги претпочита судските спорови на штета на иновирањето, со што се поништува нивното демократско оправдување. Производителите на софтвер се приморани да трошат средства и време за бирократија, тужби и заобиколување на сомнителни побарувања, средства што инаку би се потрошиле за истражување и развој. Сопствениците на софтверски патенти, од кои некои и не произведуваат софтвер, се здобиваат со можност да применуваат нефер контрола врз пазарот.
Грешките на САД

Во САД секоја година се трошат милијарди долари во судски спорови околу софтверските патенти, не само меѓу софтверски компании, туку и со други компании само затоа што тие имаат веб-страница (ова започнува да се случува и во Европа). Оваа грешка во Европа треба да се избегне.

Ги поттикнуваме законодавците:

• Да донесат национални правни разјаснувања за законите за патенти за да оневозможат прифаќање на софтверски патенти;
• Да ги поништат сите одобрени барања за патенти што може да бидат прекршени со извршување софтвер на програмабилни уреди;
• Да се трудат да ги пренесат овие правила на европско ниво, вклучително и Европската конвенција за патенти.