Бројот на училишта во Европската унија коишто користат слободен софтвер на компјутерите сè уште е мал. Сепак, одреден број училишта веќе го имаат предвид слободниот софтвер. Во другите земји, како Русија и Турција, образовните институции многу побрзо го прифаќаат овој вид на софтвер.

Според извештајот на веб-сајтот на германскиот дневен весник Мителдојче Цајтунг, Маркус Алиг, ученик во Баленштетер гимназијата во германскиот град Баленштет пресметал дека неговото и соседното училиште може да заштедат илјадници евра доколку мигрираат од комерцијален на слободен софтвер со отворен код.

По двегодишното истражување на оваа тема, Алиг пресметал дека миграцијата на дваесет корисници би му заштедила 25.000 евра на едно училиште. Тука се земени предвид и трошоците за набавка и лиценцирање, миграција па дури и цената за обука на корисниците, известува весникот.

Италијанскиот град Понтедера тукушто инсталираше 45 нови компјутери кои работат на слободен софтвер во компјутерските лаборатории во три училишта. Учителите се обучуваат како да ги користат системите со ГНУ/Линукс, се вели во извештајот на веб-сајтот на Радио Носталгија. Тие го цитираат аналитичарот Стефано Тоњарели: „Нашата цел е да се зголеми употребата на слободниот софтвер со отворен код од страна на младите луѓе и јавната администрација.“

Ова лето, во Обединетото Кралство започна двегодишен проект за информирање на училиштата за слободниот софтвер и за нивна поддршка во примената и користењето на овој вид на софтвер. Проектот „Училишта со отворен код“ е финансиран од Бекта, Британска едукативна агенција за ИТ.

На ова се надоврзуваат и проектите во Париз, Франција, каде на почетокот на оваа школска година 175.000 ученици добија УСБ мемориски стикови со апликации базирани на слободен софтвер, што укажува на тоа дека се повеќе училишта го земаат предвид слободниот софтвер. Сепак, примената на слободен софтвер во ЕУ е оскудна во споредба со, на пр. Русија. Наредната година, сите училишта во оваа земја ќе имаат инсталирано слободен софтвер на сите училишни компјутери. Прифаќањето на слободниот софтвер во ЕУ исто така оди бавно во споредба со Турција, каде што слободниот софтвер стана дел од школскиот наставен план и сите училишни компјутери во компјутерските лаборатории веќе имаат инсталиран ГНУ/Линукс покрај Мајкрософт Виндоуз.

Извор: Open Source Observatory "Europe's schools remain shy about open source" 23 ноември, 2008.