Советниците на Кисела Вода едногласно одлучија да не земат надоместок за присуство на седници за јануари, февруари и за март, а како компензација да си ги присвојат општинските компјутери.

Советниците од Општина Кисела Вода се откажаа од паушалите од по 9.600 денари месечно за присуство на седници за јануари, февруари и за март, но за возврат изгласаа да си ги присвојат општинските компјутери. Тие вчера едногласно, без дискусија, ја донесоа предлог-одлуката и си обезбедија услови, по завршување на четиригодишниот мандат во Советот, компјутерите да си ги однесат дома.

"Не само што поведовме иницијатива за воведување на Електронски совет во Кисела Вода туку и за 9 месеци, колку што тој функционира, ние ја осовременивме работата на Советот. Заштедивме пари за хартии и за телефон, па мислиме дека сега имаме право да си ги земеме компјутерите. Со тоа нема да и наштетиме на Општината туку, ако се пресмета добро, може да се утврди дека остануваат вишок пари во Кисела Вода", вака советниците го образложија предлогот за компензација, поднесен од Координативното тело на Советот.

Градоначалникот на Општина Кисела Вода Џорџе Арсов вчера, избезумен од ваквата одлука, ја напушти седницата на Советот. Тој е против оваа одлука и најави дека ќе направи се за да го заштити општинскиот имот.
"Ваквата одлука е срам за Општината. Не знам како можат советници да носат вакви одлуки кои се против граѓаните. Ако советниците со својата работа на компјутерите изминативе 9 месеци придонеле за доброто на граѓаните на Кисела Вода, тогаш преостанува сите во Општината на крајот на овој мандат да си однесеме дома општински предмети. Има Општината и други компјутери, телевизор... ", револтирано коментираа вработените во Општината.

Електронскиот совет во Кисела Вода се воведе во мај минатата година и секој советник доби лаптоп Е510, односно беа набавени 23 компјутери. Од Општината вчера никој не сакаше да каже колку точно чинеле лаптопите, со објаснување дека се во шок. За разлика од нив, советниците по седницата се опуштија. Сите заедно отидоа на ручек во кафеана да прослават за одлуката.

(М.Ѓ.)

Извор: Вест „Си ги присвоиле лаптопите место паушали“ бр.2611, 28 февруари, 2009.