Сподели:

?

Претседателот на Македонија Бранко Црвенковски вчера на Машинскиот факултет во Скопје го отвори првиот регионален авторизиран тренинг-центар на AVID/Softimage. Тренинг-центарот ќе биде место за едукација за softimage - софтвер за 3Д-моделирање и компјутерска анимација за филмската и ТВ-индустрија, постпродукцијата и за индустријата за интерактивни забавни програми. Центарот треба да понуди професионална едукација со ексклузивен пристап до технологија на високо ниво. Доказ за успешноста на овој софтвер е неговата примена во повеќе филмски мегахитови преполни со компјутерски ефекти, како што се „Матрикс“, „Господар на прстените“, „Војна на ѕвездите“. Црвенковски на отворањето на тренинг-центарот рече:

- Сигурен сум дека наскоро потписот на некој цртан филм, реклама или делови од познатите холивудски филмови ќе биде потпис токму на некој од учесниците во овој тренинг-центар, на оние што во иднина ќе бидат носители на развојот на дигиталната забавна индустрија во земјава. Тој најави дека во соработка со УСАИД ќе додели пет стипендии на идните најталентирани учесници во овој Центар.

Даниел Атанасовски, менаџер во Аксис-продукција, која е партнер во основањето на центарот, вели дека ова е прв ваков тренинг-центар на Балканот.

- Центарот ќе прими 90 студенти на првата обука. Таа ќе трае од три до шест месеци, по што студентите ќе добијат сертификати. Првенците од обуката ќе бидат вработени во Аксис-продукција и ќе бидат ангажирани на изработка на проекти од странски филмски компании - рече Атанасовски.