Метаморфозис е независна, непартиска и непрофитна фондација со седиште во Скопје, Република Македонија. Нејзини главни цели се развој на демократијата и просперитет преку промоција на економија базирана на знаење и информациско општество.
Сенаторот Џон Корнин, републиканец од Тексас, објавил дека оваа година ќе ја обнови борбата за донесување на законот за јавен пристап преку интернет до податоците од истражувања кои се финансирани од сојузниот буџет. Законот (Federal Research Public Access Act) бара таквите истражувања да бидат достапни бесплатно во рок од шест месеци по објавувањето.
- Ако даночните обврзници плаќаат за проекти финансирани од сојузната влада, тогаш тие заслужуваат и пристап до она за што платиле – изјавил за „Вајерд“ портпаролот на сенаторот. - Овие истражувања се спроведени со пари од граѓаните и од истражувачи во јавни институции. Но, не се достапни за сите.
Корнин го предлага законот заедно со демократот Џозеф Либерман, со намера да биде ставен на гласање во текот на оваа година.
Веќе неколку граѓански иницијативи како Алијансата за пристап на даночните обврзници (Alliance for Taxpayer Access) го поддржуваат законот. Студентската организација Слободна култура (FreeCulture.org) го прогласи 15 февруари за Национален ден на слободниот пристап искажувајќи ја на тој начин својата поддршка на предлог-законот.
