Сподели:

?

Од 1 јули разговорите по фиксен телефон подолги од една минута и 20 секунди ќе чинат најмалку двојно поскапо. Во телекомот очекуваат 22 милиони евра приход од поскапувањето, но тврдат дека тоа нема да го погоди стандардот на граѓаните.

Бордот на директори на Македонски телекомуникации одлучи тарифирањето на телефонските разговори од јули да се врши на секои 20 секунди, а не како што беше досега на три минути. Ако сега за триминутен разговор се плаќа 1,38 денари, со новата цена ќе се плаќаат 2,97 денари. Поевтинуваат само разговорите кои се пократки од една минута и 20 секунди. Сега за разговор од 20 секунди се плаќа 1,38 денари, а според новата цена 0,33 денари.

Цената на телефонскиот импулс изнесува 0,33 денари, а тој трае 20 секунди. Новиот тарифен модел предвидува повеќекратно поскапување за подолги разговори по фиксен телефон. Ако разговорот трае шест минути ќе плаќате 5,94 денари, наместо сегашните 2,76. Разговор од 12 минути ќе чини 11,80, наместо сегашните 5,52 денари. Ова најмногу ќе ги погоди фирмите, корисниците на Интернет, како и граѓаните кои практикуваат подолги телефонски разговори.

Во Телекомот пресметале дека новата тарифна политика нема многу да го влоши животниот стандард на граѓаните бидејќи речиси две третини од граѓаните и досега ги сведувале разговорите на траење од околу една минута. И покрај тоа, новото зголемување на цените ќе и донесе екстра приход на компанијата од осум отсто, односно повеќе од 22 милиони евра.

Новата ценовна политика беше изгласана на седницата на Бордот на директори во петокот.

С. Ј.